Dy shtetas letonezë janë arrestuar në Angli, pasi dyshohet se kanë kaluar rrethimin e bazës së Forcave Ajrore Mbretërore (RAF) në Molesworth, në rajonin e Cambridgeshire. Autoritetet dyshojnë se ata mund të kenë pasur si qëllim kryerjen e një vepre që lidhet me sigurinë kombëtare.
Hetimet po drejtohen nga njësitë kundër terrorizmit.
Të dyshuarit, 36 dhe 32 vjeç, jetojnë në Mbretërinë e Bashkuar. Sipas gazetës The Times, ata u ndaluan pasi, natën e së mërkurës, policia gjeti një automjet të braktisur pranë bazës ushtarake. Më pas, u zbulua edhe një çarje e vogël në gardhin rrethues të saj.
Në bazën e Molesworth janë të vendosur edhe ushtarakë amerikanë, ndërsa aty ndodhet gjithashtu një qendër e inteligjencës së NATO-s.
Një tjetër bazë britanike, RAF Fairford, ishte në qendër të vëmendjes javën e kaluar, kur u arrestuan shtatë të rinj, të dyshuar se po planifikonin një sulm të mundshëm, për të cilin është akuzuar Irani.
Megjithatë, të shtatë u liruan me kusht dhe nuk janë akuzuar zyrtarisht.
Helen Flanagan, përgjegjëse për luftën kundër terrorizmit në policinë e Londrës, tha se deri tani nuk ka prova që incidenti në Molesworth të ketë lidhje me atë të javës së kaluar në Fairford. Ajo u bëri thirrje qytetarëve të qëndrojnë vigjilentë dhe të njoftojnë policinë nëse vërejnë diçka të dyshimtë.
Marinari britanik akuzohet për spiunazh në favor të Rusisë
Ndërkohë, një marinar i Marinës Mbretërore britanike është paraqitur në gjykatën Westminster në Londër, nën akuzën e spiunazhit në favor të një shteti të huaj, që dyshohet të jetë Rusia.
Teddy Young, 24 vjeç, u arrestua në banesën e tij në Bedfordshire dhe u akuzua sipas ligjit britanik për sigurinë kombëtare.
Sipas policisë metropolitane të Londrës, Young dyshohet se ka marrë, kopjuar, regjistruar ose ruajtur informacione të mbrojtura me qëllim që t’i shërbente një shteti të huaj. Veprimet e dyshuara mendohet të kenë ndodhur nga nëntori i vitit 2024 deri në maj të vitit 2025.
Autoritetet pretendojnë se bëhej fjalë për informacione të ndjeshme, zbulimi i të cilave mund të dëmtonte sigurinë ose interesat e Mbretërisë së Bashkuar.
Sipas burimeve të The Times, ndër elementet që përmenden në akuzë janë përkthimi i një mesazhi në gjuhën ruse, kërkimet në internetin e errët (dark web) dhe kërkimi i një platforme online përmes së cilës mund të dërgoheshin informacione drejt Rusisë.
Të dyja çështjet janë nën hetim dhe akuzat ndaj personave të përfshirë nuk përbëjnë prova të fajësisë së tyre.
admin5