By admin7 
Aleanca për Shqiptarët, krahu i Ziadin Selës ka dorëzuar në Kuvend propozim-Ligjin për përfaqësim të drejtë dhe adekuat. Sipas Selës, kjo kauzë është e subjektit të tij dhe propozimi bazohet në Marrëveshjen e Ohrit. Në këtë propozim Sela tha se është kujdesur edhe për përfaqësimin ligjor.
“Ky ligj është një ligj i mirëfilltë, një ligj i cili ua garanton qytetarëve këtë të drejtë, të gjitha bashkësive etnike dhe nuk ka për qëllim majorizimin ose përfaqësimin më tepër të një bashkësie etnike ndaj tjetër por përfaqësimin proporcional dhe të drejtë ashtu siç e parashikon Kushtetuta,” deklaroi Ziadin Sela, Aleanca për Shqiptarët.
Sipas Selës, propozimi parashikon obligimin e institucioneve për të ndihmuar në ruajtjen dhe garantimin e përfaqësimit të drejtë dhe adekuat. Paralelisht me propozimin e tyre, Qeveria tashmë ka dorëzuar në Kuvend një propozim për përfaqësimin. Opozita shqiptare është shprehur se nuk do të mbështesë pasi e ka cilësuar si skandaloz.