Gjykata Supreme i anuloi dënimet për zjarrin në spitalin modular në Tetovë, ku më 8 shtator 2021 humbën jetën 14 persona, dhe e ktheu çështjen për rigjykim. Gjykata konstatoi mangësi serioze në arsyetimet e gjykatave të shkallëve më të ulëta, veçanërisht në pjesën e lidhjes kauzale mes veprimeve të të akuzuarve dhe tragjedisë, si dhe në vlerësimin e provave për shkaqet dhe përhapjen e zjarrit, përcjell Pa Censurë.
Vendimi u mor më 22 tetor dhe u publikua sot nga Gjykata e Lartë. Me të u pranuan kërkesat për rishqyrtim të jashtëzakonshëm të dënimit të formës së prerë, të paraqitura nga dy të dënuarit: ish-drejtori i Spitalit Klinik në Tetovë, Florin Besimi, dhe ish-drejtori ekonomik Artan Etemi.
U anuluan dënimi i Gjykatës Themelore të Tetovës i datës 16 maj 2025 dhe dënimi i Gjykatës së Apelit të Gostivarit i datës 26 nëntor 2025. Me dënimin e shkallës së dytë, të dyve u ishin shqiptuar dënime me burgim nga tre vjet secili për veprën penale „Vepra të rënda kundër sigurisë së përgjithshme“.
Në arsyetim, Gjykata Supreme thekson se gjykatat e shkallëve më të ulëta nuk kishin shpjeguar mjaftueshëm nga cilat prova del përfundimi se dy të akuzuarit kishin vepruar si bashkëkryerës. Nuk ishte e qartë as mbi bazën e cilave prova ishte vërtetuar se së bashku nuk kishin siguruar aparatet e nevojshme kundër zjarrit dhe rrjetin e hidrantëve.
Vëmendje e veçantë iu kushtua pyetjes nëse mungesa e pajisjeve kundër zjarrit ishte shkaku i shpërthimit të zjarrit apo kishte ndikuar në përhapjen e tij dhe në pasojat.
Gjykata Supreme vlerësoi se gjykatat e shkallëve më të ulëta nuk kishin vërtetuar mjaftueshëm lidhjen kauzale mes mangësive konkrete që u ngarkohen të akuzuarve dhe vdekjes së 14 personave.
Në vendim shqyrtohen edhe ekspertizat e ndryshme për shkaqet e zjarrit. Sipas një ekspertize, zjarri kishte filluar për shkak të një qarku të shkurtër elektrik të lidhur me kabllon e defibrilatorit që ishte përdorur gjatë reanimimit të një pacienti, transmeton Pa Censurë.
Nga ana tjetër, në ekspertizën gjermane thuhet se zjarri ka të ngjarë të ketë shpërthyer pranë një prej shtretërve në dhomën e spitalit, por për shkak të shkallës së lartë të shkatërrimit nuk mund të vërtetoheshin prova të qarta për shkakun e saktë. Në të theksohet edhe se përhapja e shpejtë e zjarrit ishte ndihmuar nga përqendrimi i lartë i oksigjenit dhe materialet e ndezshme të përdorura në objekt.
Gjykata e Lartë shtron edhe pyetjen se pse nuk ishte pranuar kërkesa e mbrojtjes që në seancën kryesore të dëgjohej eksperti gjerman, edhe pse gjetjet e tij ishin paraqitur si provë.
Në arsyetim përmenden edhe ekspertiza të tjera që tregonin probleme të mundshme me instalimin elektrik, mungesën e barrierave kundër zjarrit mes ambienteve dhe përdorimin e materialeve ndërtimore që lejonin përhapjen e shpejtë të zjarrit. Gjykatat e shkallëve më të ulëta nuk kishin dhënë arsyetim të mjaftueshëm pse këto prova nuk ishin vlerësuar siç duhet.
Gjykata e Lartë arriti në përfundimin se Gjykata Themelore e Tetovës dhe Gjykata e Apelit e Gostivarit nuk kishin dhënë përgjigje të argumentuara mjaftueshëm për pyetjet që ishin thelbësore për vërtetimin e përgjegjësisë penale.
Me vendimin e ri, çështja kthehet para Gjykatës Themelore të Tetovës, e cila do të duhet të veprojë përsëri, të shqyrtojë çështjet e diskutueshme dhe të marrë një vendim të ri në përputhje me udhëzimet e Gjykatës Supreme.
Njëkohësisht, kërkesa për rishqyrtim të jashtëzakonshëm e paraqitur nga Spitali Klinik Publik i Tetovës u refuzua si e palejueshme. Ndryshe nga kërkesat e dy të dënuarve, kërkesa e personit juridik nuk ishte e lejuar sipas kushteve ligjore për përdorimin e këtij mjeti të jashtëzakonshëm juridik.
Vendimi i Gjykatës Supreme nuk përbën dënim lirues për dy të akuzuarit, por anulim të vendimeve të mëparshme gjyqësore dhe kthim të çështjes për procedurë të re.
admin 
admin7