Emisarët e presidentit amerikan, Steve Witkoff dhe Jared Kushner, do të takohen sot në Miami me negociatorët ukrainas dhe përfaqësues të vendeve evropiane për të diskutuar “ide dhe propozime të reja” që synojnë zhbllokimin e negociatave për përfundimin e luftës mes Rusisë dhe Ukrainës.
Lajmi raportohet nga Axios, duke cituar zyrtarë amerikanë dhe ukrainas.
Në takim janë ftuar edhe këshilltarët për sigurinë kombëtare të Britanisë së Madhe, Francës dhe Gjermanisë, si dhe përfaqësues të NATO-s dhe Bashkimit Europian. Bisedimet pritet të zgjasin dy ditë dhe do të përqendrohen te mundësitë për arritjen e një marrëveshjeje, garancitë e sigurisë për Ukrainën dhe një plan për rimëkëmbjen ekonomike të vendit pas luftës.
Sipas burimeve të cituara nga Axios, një nga propozimet që pritet të diskutohet është një armëpushim i pjesshëm që do të ndalonte sulmet ndaj infrastrukturës energjetike dhe transportit të drithërave. Kievi ka shprehur gatishmërinë për të shqyrtuar një marrëveshje të tillë, ndërsa Moska deri më tani ka treguar pak gatishmëri për këtë hap.
“Jemi të gjithë të shqetësuar për dimrin. Do të jetë një dimër i vështirë nëse lufta nuk ndalet. Prandaj, SHBA-ja po përpiqet të ndërmjetësojë mes palëve, me synimin për të hartuar një propozim të përbashkët”, tha një burim amerikan për Axios.
Nga pala ukrainase, në bisedime pritet të marrin pjesë kreu i Zyrës së Presidentit Volodymyr Zelensky, Kyrylo Budanov, drejtuesi i inteligjencës së jashtme, Rustem Umerov, këshilltari diplomatik Serhiy Kyslytsya dhe deputeti Davyd Arakhamia.
Witkoff dhe Kushner zhvilluan vizita në Moskë dhe Kiev në fillim të shtatorit dhe, që prej asaj kohe, kanë punuar me palët ruse dhe ukrainase për përditësimin e një nisme paqeje.
Sipas një zyrtari amerikan, dy emisarët u takuan të enjten me presidentin Donald Trump për t’i paraqitur propozimin më të fundit amerikan dhe për të marrë vlerësimet e tij përpara bisedimeve në Miami.
Në takim morën pjesë gjithashtu sekretari i Thesarit, Scott Bessent, dhe zëvendëskëshilltari për sigurinë kombëtare, Mike Needham.
Ndërkohë, sekretari amerikan i Shtetit, Marco Rubio, deklaroi të enjten në Lisbonë se lufta ka arritur në një “ngërç”, duke theksuar se Washingtoni synon të parandalojë përshkallëzimin e mëtejshëm të luftimeve gjatë javëve të ardhshme dhe të gjejë një rrugë drejt përfundimit të konfliktit.
Presidenti ukrainas Volodymyr Zelensky konfirmoi se Kievi po diskuton me Washington-in mundësinë e një armëpushimi që do të përfshinte infrastrukturën energjetike dhe transportin e drithërave.
Megjithatë, ai u tregua i rezervuar për rezultatet e mundshme, duke theksuar se është ende herët të thuhet se çfarë mund të arrihet dhe duke shprehur shqetësimin se Rusia mund të mos respektojë një marrëveshje të tillë.
Sipas Axios, pavarësisht skepticizmit në Kiev, zhvillimet politike në SHBA, përfshirë zgjedhjet e mesmandatit, si dhe interesimi i mundshëm i Rusisë për lehtësimin e sanksioneve, mund të ndikojnë në gatishmërinë e Moskës për të pranuar një formë armëpushimi.
Një tjetër mundësi që po shqyrtohet është një vizitë e Witkoff dhe Kushner në Moskë më vonë gjatë këtij muaji, për të zhvilluar bisedime të mëtejshme me presidentin rus Vladimir Putin.
admin5