Aleanca ka reaguar pas publikimit të Raportit të Progresit të Komisionit Evropian për Kosovën, duke e cilësuar atë si dëshmi të stagnimit dhe dështimit të Qeverisë në disa fusha kyçe.
Në reagimin e saj, Aleanca kritikuar qeverisjen e deritanishme, duke thënë se pas më shumë se gjashtë vitesh në pushtet, vendi po përballet me degradim institucional dhe mungesë të përparimit në rrugën drejt integrimit evropian.
“Raporti i sotëm i Progresit nga Komisioni Evropian është shuplaka e fundit për këtë pushtet dhe pasqyra reale e një degradimi të gjatë. Pas më shumë se gjashtë viteve në qeverisje, kjo qeveri dëshmoi prap se ka mbetur në dorën e njerëzve të padijshëm dhe të korruptuar. Ky dokument zyrtar i Brukselit nuk lë hapësirë për manipulim apo propagandë, pasi secili vlerësim konstaton stagnimin dhe paralizën institucionale në të cilën është zhytur Kosova”, thuhet në reagimin e Aleancës.
Reagimi i plotë i Aleancës:
Raporti i Progresit vulos dështimin gjashtëvjeçar të kësaj qeverie
Raporti i sotëm i Progresit nga Komisioni Evropian është shuplaka e fundit për këtë pushtet dhe pasqyra reale e një degradimi të gjatë. Pas më shumë se gjashtë viteve në qeverisje, kjo qeveri dëshmoi prap se ka mbetur në dorën e njerëzve të padijshëm dhe të korruptuar.
Ky dokument zyrtar i Brukselit nuk lë hapësirë për manipulim apo propagandë, pasi secili vlerësim konstaton stagnimin dhe paralizën institucionale në të cilën është zhytur Kosova.
Ky raport shënon pikën më të ulët në rrugëtimin tonë drejt integrimit evropian. Për herë të parë, dokumenti është i mbushur me konstatimet dramatike “asnjë progres” dhe “progres i limituar”.
Krahasimi me vitet paraprake, kur Kosova shënonte hapa përpara dhe ndërtonte kapacitete, sot tregon një kthim prapa në të gjitha fushat jetike. Vendimi i pushtetit për ta çuar vendin në tri palë zgjedhje brenda një viti ka bllokuar legjislativin dhe ka lënë shtetin pa orientim, duke na shkëputur përfundimisht nga ritmi i vendeve të rajonit.
Në fushën e drejtësisë, aty ku u premtua reforma e thellë, Bashkimi Evropian gjeti zero përparim.
Gjyqësori është lënë i cenueshëm nga ndërhyrjet, ndërsa lufta ndaj korrupsionit ka prodhuar vetëm rezultate të kufizuara në letër. E njëjta neglizhencë vërehet edhe në kontrollin e financave publike, ku qeveria ka injoruar plotësisht rekomandimet e vitit të kaluar, duke dëmtuar menaxhimin e investimeve dhe duke zbehur besueshmërinë tonë para partnerëve ndërkombëtarë.
Edhe propaganda për rritje ekonomike u rrëzua plotësisht nga gjetjet e raportit. Ekonomia e Kosovës sot karakterizohet nga konkurrueshmëria e dobët, varësia e thellë nga importet dhe rritja e shkallës së papunësisë, e cila po godet rëndë gratë dhe të rinjtë. Në vend të zhvillimit, ky pushtet ka krijuar një ambient që i dëbon profesionistët nga vendi.
Kësaj i shtohet edhe dështimi në mbrojtjen e të drejtave elementare, ku dhuna me bazë gjinore mbetet e përhapur dhe mediat përballen me mungesë transparence e presione të vazhdueshme.
Aleanca ka paralajmëruar në vazhdimësi se kjo mënyrë e papërgjegjshme e udhëheqjes do t’i kushtojë shtetit tonë.
admin5 
admin7 
admin