Meloni vendos lule për ushtarët italianë që vdiqën në BeH: Nuk do t’ju harrojmë
Kryeministrja italiane Giorgia Meloni, e shoqëruar nga Ministri i Mbrojtjes Guido Crosetto, vendosi një buqetë me trëndafila në Circus Maximus në Romë, për të nderuar katër ushtarë italianë që humbën jetën në një rrëzim tragjik helikopteri pranë Brçkos.
Ajo u shpreh se mendimet e saj sot janë me ta dhe me të dashurit e tyre.
“Simone, Claudio, Franco Adriano, Laura. Katër jetë të ndërprera në mes ndërsa shërbenin për Italinë. Ne dëshironim që ‘Fshati i Mbrojtjes’ (Defence Village) — i ngritur në prag të 4 nëntorit — të bëhej një vend takimi i hapur për të gjithë. Një vend ku çdo italian mund të sjellë një lule, të lërë një mesazh ose të ndalet në heshtje; një vend që u mundëson familjeve të të rënëve tanë të ndiejnë afërsinë e të gjithë kombit,” deklaroi ajo.
Duke pranuar se asnjë fjalë nuk mund ta mbushë një zbrazëti kaq të thellë, ajo theksoi se prania është një detyrim.
“Të ruajmë kujtimin e atyre që kemi humbur dhe t’u ofrojmë ngushëllim të lënduarve e të dashurve të tyre në këto kohë të vështira. Atyre që vizitojnë Circus Maximus, u kërkoj një gjest të thjeshtë: sillni një lule. Në atë lule, ju do të përcillni dashurinë tuaj, respektin tuaj dhe mirënjohjen e Italisë. Simone, Claudio, Franco Adriano, Laura — ne nuk do t’ju harrojmë,” shkroi ajo në një mesazh prekës në rrjetin social X.
Ndërkohë, një delegacion italian i kryesuar nga Ministri i Mbrojtjes Guido Crosetto ka mbërritur në Aeroportin e Tuzlës, nga ku janë nisur drejt Brçkos. Në momentin e aksidentit, në helikopter ndodheshin 15 pjesëtarë të misionit EUFOR Althea, ndërsa katër shtetas italianë humbën jetën. Bëhet fjalë për dy ushtarakë, rreshterët Simone Ruggia dhe Claudio Marchesi, si dhe dy anëtarë të Kryqit të Kuq, togerin Franco Adriano Zecchill dhe rreshteren Laura Procacci.
11 persona të tjerë mbetën të lënduar, por, sipas informacioneve në dispozicion, jeta e asnjërit prej tyre nuk është në rrezik.
admin5