Presidenti ukrainas Volodymyr Zelensky ka zhvilluar biseda telefonike me presidentin finlandez Alexander Stubb dhe kryeministrin norvegjez Jonas Gahr Støre, pasi këta të fundit kishin biseduar me presidentin rus Vladimir Putin. Në qendër të diskutimeve ishin lufta në Ukrainë, siguria në rajonin e Baltikut dhe mundësitë për arritjen e një paqeje të qëndrueshme.
Stubb dhe Støre deklaruan se biseda me Putinin ishte e hapur dhe përmbajtësore. Kontakti i drejtpërdrejtë mes liderëve nordikë dhe kreut të Kremlinit konsiderohet i rrallë, në një kohë kur marrëdhëniet mes Rusisë dhe vendeve evropiane mbeten të tensionuara.
Sipas shërbimit për shtyp të Kremlinit, të cituar nga agjencia ruse e lajmeve TASS, Putin foli për situatën aktuale në zonat e konfliktit në Ukrainë dhe për shkaqet që, sipas tij, çuan në luftë.
Presidenti rus theksoi se një paqe e drejtë dhe afatgjatë në Ukrainë mund të arrihet vetëm nëse merren parasysh edhe interesat e Rusisë. Gjatë bisedës u diskutuan gjithashtu çështjet e sigurisë në Detin Baltik dhe në Evropën Veriore.
Të tre liderët nënvizuan rëndësinë e respektimit të së drejtës ndërkombëtare detare dhe të lirisë së lundrimit, në një rajon me rëndësi strategjike për sigurinë evropiane.
admin5