Ministri i Jashtëm rus, Sergey Lavrov, ka mbërritur në Atlanta, ku më 30 dhe 31 tetor po zhvillohet një takim i ministrave të jashtëm të G20-ës. Fluturimi nga Moska zgjati 20 orë e 10 minuta, pasi avioni u desh t’i shmangej hapësirës ajrore të vendeve që Rusia i konsideron armiqësore.
Sipas agjencisë shtetërore ruse të lajmeve TASS, avioni qeveritar që transportonte delegacionin rus u ul në aeroportin e kryeqytetit të shtetit amerikan të Xhorxhias.
Takimi në Atlanta organizohet nga Departamenti Amerikan i Shtetit, me Sekretarin e Shtetit, Marco Rubio, në rolin e nikoqirit. Shtetet e Bashkuara mbajnë presidencën e G20-ës këtë vit dhe Uashingtoni i ka përcaktuar kërcënimet ndaj lirisë së lundrimit, sigurisë energjetike dhe ushqimore, si dhe zinxhirëve të furnizimit, si temat kryesore të diskutimit.
Zëdhënësja e Ministrisë së Jashtme ruse, Maria Zakharova, deklaroi në një konferencë për shtyp në Moskë se delegacioni rus në Atlanta do të paraqesë qëndrimin e tij lidhur me atë që e përshkruan si ndikim shkatërrues në tregjet globale, të shkaktuar nga sanksionet, sekuestrimi i aseteve dhe “pirateria në det të hapur”.
Sipas saj, Moska do të angazhohet gjithashtu për reformimin e institucioneve ekonomike globale dhe për një “botë shumëpolare”.
Zakharova vuri në dukje më tej se çështjet që lidhen me udhëtimin – përfshirë lëshimin e vizave amerikane për anëtarët e delegacionit – u zgjidhën në momentin e fundit, gjë që ajo e interpretoi si një shenjë se jo të gjithë në Uashington janë të kënaqur me këtë vizitë.
Lavrov është nën sanksione amerikane që nga viti 2022, pas fillimit të pushtimit rus të Ukrainës. Takimi i ministrave është tubimi i fundit i rëndësishëm para samitit të liderëve të G20-ës, i planifikuar për datat 14–15 dhjetor në kompleksin “Doral” të Trumpit, pranë Miamit.
Rubio deklaroi më herët se Uashingtoni e kishte ftuar presidentin rus, Vladimir Putin, në samit, ndërsa zëdhënësi i Kremlinit, Dmitry Peskov, i tha agjencisë TASS se ende nuk është marrë një vendim nëse Putini do të marrë pjesë.
Lavrov mbërrin në SHBA në një kohë kur po shtohen përpjekjet amerikane për të arritur një marrëveshje që do t’i jepte fund luftës në Ukrainë. Pas një takimi midis të dërguarit amerikan Steve Witkoff dhe Putinit në Shën Petersburg më 21 tetor, Kremlini bëri të ditur se bisedime të reja trepalëshe, në të cilat do të përfshihen Rusia, Ukraina dhe SHBA-ja, mund të zhvillohen në Abu Dabi – ndoshta që në muajin nëntor.
admin5 
admin